A New Design

30 June 2017 – Buhi, Camarines Sur –

Kasado na ana kapuso hanging bridge sa barangay Iraya nin huli sa gigibohon nyading groundbreaking ceremonies sa Hulyo 3.

In koneksyon nyadi, sa regular session nya na Sangguniang Bayan kaso lunes, naipasar ana usad na resolucion na nagitao nin awtorisasyon ki Mayor Margarita M. Aguinillo na mag entra sa usad na Memorandum of Agreement (MOA) ki Executive Vice President Luz Annalee O. Escudero-Catibog nya na GMA Kapuso Foundation, Inc. para sa proyektong “Iraya Steel Hanging Bridge”.

Sosog sa MOA, ading 30 metros na cable-suspended steel pedestrian bridge o tulay itutugdas sa Iraya river sa mismong existidong tulay na nadestroso nyadtong nakaaging bagyong Nina kaso Deciembre 25, 2016.

Maroromroman, na enterong pinagisakit ana mga nagibalyo sa existidong mga kable ag peligroso sa mga eskwela ana nasambit nang dispalinhadong tulay na nasiripan nya na GMA Kapuso kaso nagbariwas adi nin relief sa Iraya kaso Enero 2017.

Nin huli nyadi iningwa nyading matinabang na foundation na mag enterbener nan in huli ta delikado na talaga adi sa mga kapuso sa nasambit nang barangay sa balyong lawod.

Mientras tanto, apwera sa LGU-Buhi, magitowangon man sa proyekto ana Department of Public Works & Highways (DPWH), Philippine Army 51st Engineer Brigade ag Iraya Elementary School sa paagi nin trabajador, equipaje ag teknikal na ayud ag iba pang abelableng facilidad.

 

Advertisements