A New Design (2)

8 August 2017 – Buhi, Camarines Sur –

Sa ginibong regular session niya na Sangguniang Bayan kasudma, usad na surat ana pinadara ni Mayor Margarita Aguinillo na nagiayat nin magkakanigong suporta ki Roger San Miguel para sa nominasyon niyadi sa 2018 Order of National Artist (ONA) for visual arts.

Sa nasabi nang surat ni Aguinillo, sinabi niyadi na ana National Commission for Culture and Arts (NACA) nagpabano nan in nominasyon para sa nasabi nang rekognisyon na kin sari si Roger San Miguel, usad na boinon dapat sanang manominar ag makaiba nin huli sa sakanyang mga famusong obra na nagi taong buhay sa kakaibang kulturang boinon sa paagi niya sakanyang makolor na mga pinta.

Ading 2018 ONA, amo ana pinaka halangkaw na rekognisyon na pinagitao sa mga Filipino na nakatao nin signifikanteng kontribusyon sa kauswagan niya na Philippine arts. Poon kaso mapundar adi kaso 1972, 66 nang national artist ana natawan nin award ag narekognisar na pinagi facilidad man niya na NACA ag niya na Cultural Center of the Philippines na kin sari si Presidente Rodrigo Duterte amo mismong magitawon nyana award.

Ana mga artist pwede sanang ma nominar nin usad sa mga kategoryang Pagbayle, Musika, Teatro, Visual Arts, Literatura, Pelikula ag Broadcast Arts, Design ag Arketikto ag Allied Arts na kin pa ana talaan sa nominasyon sa Septiembre  30 niyading presenteng taon.

Mientras tanto, tulos man na pinag refer ni Bise Alkalde Rey Lacoste sa Committee on Culture and Arts na pinamamayuhan ni konsehal Don Sibangan para sa magkakanigong lehislasyon.

 

Advertisements