IMG_20170719_150935

August 9, 2017 – Buhi, Camarines Sur –

Deadma o endi sinimbag ni Mayor Margarita M. Aguinillo ana reklamo ni konsehal Ting Villadares na ipinaagi sa usad na surat na narecibe pa niya na oficina ni Mayora kaso Hulyo 19, 2017 sa oras na 10:44 AM.

Ana reklamo ni Villadares amo ana mga ukay-ukay stalls sa pagotanan niya na Buhi Millenium Center ag Municipal Building na segon ki Villadares usad na “nuisance per se” nin huli ta pangit nang pagkiton, luminuwas na sa merkado publiko ag pwededeser pa ading pagponan nin kalayo na nagi uma sa seguridad niya na mga pag arabayan na oficina arog niya na Comelec, HRMO ag Local Civil Registrar.

Sinabi pa ni Villadares na poon kaso maibutang ading mga ukay-ukay na adi, uda na lugar ana kaabay na Buhi Institute Foundation (BIF) para mag conducer nya na sakandang oro-aldaw na flag ceremony na kin sari ading nasabi nang eskwelahan nagibayad man nin buwis ag mayor’s permit sa municipyo.

Kaso nakaaging sesyon, nagproponer si Villadares na magpasar nin resolution na ideklara ana nasabi nang mga ukay-ukay stall bilang usad na “nuisance per se” ag alinon aan sa nasabi nang government property.

Sosog sa akta republika 7160 Section 447, usad sa poder niya na Sangguniang Bayan amo ana ma regulate ana mga aktibidad dapit sap ag usar nin raga, edificio ag mga istraktura nin municipalidad para ma promote ana general welfare nin huli niyadi pwede magdeklaram, mag prebentar nin uno man na nuisance, dagdag pa ni Villadares.

Sosog man sa akta republika 6713 o ana Conduct and Ethical Standrds for Public Officials and employees, na nagisugo sa ngamin na ana enterong public officials ag empleyados kaipwan na magsimbag sa surat, telegrama o uno pang komunikasyon sa loog nin 15 working days na kin sari nakabutang sa simbag kin unong aksyon ana ginibo.

Mientrastanto, ipinag refer na ni Bise alkalde Rey P. Lacoste ana proponidong lehislayon ni Villadares sa joint committee on Public works, market, legal matters para sa magkakanigong resolucion.

Advertisements