IMG_20170810_125411_279

10 August 2017 – Buhi, Camarines Sur –

Nagkomento si konsehal Ting Villadares sa surat o categorical reply ni Mayor Margarita M. Aguinillo kaso marecibe niya adi kasudma.

Maroromroman na kaso Hulyo 19 nagsurat nagpaabot si Villadares nin reklamo ki Aguinillo manonogod sa ukay-ukay sa pagoltanan niya na Buhi Millenium Center ag municipal building na kin sari pa binano adi ni Villadares na nuisance.

Kasudma man sana, nagkomento si Villadares kasimbigan ni Aguinillo makalihis ana 14 dias matapos ading marecibe sa oficina kaso Hulyo 20.

Sabi ni Villadares na ana pag-asigurar na ana enterong negosyo sa banwaan agko dapat magkakanigong licensya o permit, trabaho adi niya na mayor, uno ta haros usad na taon na iya sa pwesto, ana eskwelahan na kaabay mismo nya na sakanyang oficina na sa kita niya agko nin safety issues na nangangaipo nin marikas na solution endi niya matawan nin solusyon.

Sabi pa ni Villadares na kin agko na iya kasunduan o agreement sa mga ukay-ukay vendors manonogod sa mga precautionary and safety measures, uno ta endi adi isi nya na Sangguniang Bayan ta ana uno man na agreement na dapat kunong logan nya na hepe ejecutivo dapat agko awtorisasyon ana SB, sosog sa RA 7160.

Dagdag pa ni Villadares, na hanggang kinauno ana temporary, na basado kuno sa inaugural speech ni Aguinillo kaso Hulyo 2016, sinabi kuno niyadi na ibabalyo niya ana merkado publiko sa estratehikong lugar kaabay niya na integrated transport terminal ag slaughterhouse.

Minetras tanto, magkaka-agko nin committee hearing dapit sa isyung adi sa Agosto 11 na kin sari ipapabano ana market supervisor, tesoreria, fire marshall, ag iba pang opisyal para pag osipan ana tungkol sa kontrobersyal na ukay-ukay stalls.

Advertisements