IMG_20170810_115054

11 August 2017 – Buhi, Camarines Sur – sinurat ni : Ting Villadares –

Nagpoon na kaso Agosto 8 ana pagconstruer nya na Gov. Migz covered court sa barangay government center ag social hall sa barangay San Vicente, Buhi, Camarines Sur.

Sa entrevista nya na buhay boinon news team ki punong barangay Bella Bacani, sinabi nyadi na ading nasabi nang proyekto kaso pebrero 2015 pa naipanuga ni gobernador Migz Villafuerte nin huli man sa esfuerzo ni Bacani ag dating alkalde ag ngowan bise alkalde Rey P. Lacoste.

Ana enterong compound mapopotos nyading nasabi nang edificio kaya “rain or shine” dagos dagos na ana enterong okasyon arog nya na mga asembleya, pabayle, programa ag iba pang aktibidades boko sana nya na mga taga buraburan maging sa mga ka-barangay sa mountain sector, sabi pa ni Bacani.

Apwera nyading proyektong covered court, pinagi pasemento naman ngowan ni gobernador Villafuerte ana mayor na tinampo na magisabaton sa patinampo man nya na DPWH na kin sari pa abot na sa barangay San Francisco (parada), dagdag pa ni Bacani.

Mientrastanto, usad sa pinagi mawot nya na mga taga buraburan ag mountain sector na macemento naman ana portion nya na tinampo arani sa simbahan paputang polangui albay para kuno dagos dagos naman ana pag asenso nya na ekonomiya sa nasabi nang sektor didi sa banwaan na Buhi.

 

 

Advertisements