IMG_20170810_140826_693

11 August 2017 – Buhi, Camarines Sur – Sinurat ni Lads Labordo –

Nagsikad na kasudma ana 3 aldaw na intramurals nya na San Vicente National High School (SVNHS) kaiba ana tolong sister delegate schools nyadi na nagialin pa sa Buhi High School, Salvacion High School ag Iraya High School.

Dawa mainit yu panahon, pinonan adi nin usad na parada ag tulos man na ginibo ana usad na opening program sa mismong campus nya na nasambit nang eskwelahan.

Pinonan ana programa sa usad na doxology na ipinasali nin mga pinili na estudyante sa direksyon man ni Nicolas Guiruela ag sinundan tulos nin pagkanta nin Lupang Hinirang na tinogtogan nya na SVNHS Drum & Xylophone Corps.

Usad man na welcome message ana itinao ni Mrs. Citadel M. Espiritu ana OIC of the month sa nasabi nang eskwelahan.

Si Adelyn Oliva, usad na 2016 Division meet swimmer among nagsulo nya na intramurals friendship flames, na sinundan nya na pagtaas nin bandera nin mga delegado, na finacilidad nya na mga year level chairperson ag mga PTA president, na kin sari si Konsehal Don Sibangan among nanguna sa Buhi High School, komo presidente nya na PTA.

Sa mesahe man niya na guest speaker na si konsehal Ting Villadares,  na agko kuno limang paagi para maging maray sa sports ag sa buhay-buhay, adi amo ana, ambisyon, maging sport sa uno man na oras, maging pacensiyoso, magka-ako nin katuyawan o kritisismo ag maki barkada sa ibang players.

Nagtao man nin mensahe si San Vicente punong barangay Bella Bacani, General PTA president Merle Crobilla ag si Regina Salvamante na nag entereno ki Principal Erma Escuro na ausencia sa nasabi nang okasyon.

Tinapos ana opening program sa magayon, makolor ag matitibay na presentacion nin Mob Dance Competition nyan na mga junior high schools ag Dance formation man nya na mga senior high schools.

Ana mga payamon magdurar asta sabado, Agosto 12 na kin sari ana  awarding & closing ceremonies gigibohon sa hapon.

Advertisements